Մայր ու որդի գնացին ռեստորան. Օրեր անց մայրը մահացավ ու որդուն զարմանալի մի նամակ եկավ
Ժամանակ տրամադրենք մեր ընտանիքին
Ամուսնությունից 21 տարի անց կինն ամուսնուն խնդրեց ճաշի և ապա կինոթատրոն հրավիրել մեկ այլ կնոջ: Նա ամուսնուն ասաց.
— Ես քեզ սիրում եմ, սակայն գիտեմ, որ նա էլ է քեզ սիրում և կցանկանար որոշ ժամանակ անցկացնել քեզ հետ:
Մյուս կինն ամուսնու մայրն էր, ով արդեն 19 տարի այրի էր, սակայն որդու աշխատանքը և ընտանիքը` կինը և երեք զավակները, խլում էին նրա ամբողջ ժամանակը, և նա միայն պատեհ առիթներով էր այցելում մորը:
Երեկոյան, երբ որդին զանգահարեց մորը` ճաշի և կինոթատրոն հրավիրելու, մայրն անհանգստացավ և հարցրեց, թե արդյո՞ք ամեն ինչ կարգին է, միգուցե ինչ-որ բա՞ն է պատահել… Որդին հանգստացրեց մորն` ասելով, որ ամեն ինչ կարգին է, պարզապես ինքը կցանկանար մորը հանդիպել, միասին ժամանակ անցկացնել…
Ուրբաթ օրն աշխատանքից հետո, երբ որդին մոտեցավ մոր տան դռանը` նրան վերցնելու, մայրը թեթևակի հուզված էր, գանգրացրել էր մազերը, հագել իր լավագույն զգեստը, ժպտում էր:
— Ընկերներիս ասացի, որ հանդիպելու եմ քեզ հետ, և այդ լուրը նրանց համար տպավորիչ էր:
Անհամբեր սպասում են, որ պատմեմ մեր հանդիպման մասին, — ասաց մայրը:
Մայր ու որդի գնացին մի գողտրիկ ռեստորան, մայրը հպարտորեն թևանցուկ էր արել որդուն: Ճաշի ընթացքում նրանք այնպես հաճույքով էին զրուցում դեսից-դենից, որ անգամ բաց թողեցին կինոսեանսի ժամը: Երբ արդեն տուն էին վերադառնում, մայրն ասաց.
— Որդիս, եկ կրկին հանդիպենք և ճաշենք, միայն թե թույլ տուր, որ մյուս անգամ ես հրավիրեմ:
— Լավ, մայրիկ, համաձայն եմ, — ասաց որդին:
Երբ որդին տուն հասավ, կինը հարցրեց, թե ինչպես անցավ հանդիպումը:
— Շատ ավելի լավ, քան կարող էի պատկերացնել, — պատասխանեց ամուսինը:
Օրեր անց մայրը մահացավ սրտի նոպայից: Նոպան անսպասելի էր, ոչինչ հնարավոր չէր անել` նրա կյանքը փրկելու համար:
Որոշ ժամանակ անց որդին ստացավ մի ծրար, որում կար գումարի ստացականի կրկնօրինակ այն նույն ռեստորանի, որտեղ մայր և որդի ճաշել էին: Ստացականին կից մի գրություն կար, որում ասվում էր. «Այս հաշիվը ես նախօրոք վճարել եմ. վստահ չեմ, թե կկարողանամ ճաշին ներկա լինել, և սակայն պատվիրել եմ ճաշ երկու անձի` քեզ և կնոջդ համար: Որդիս, երբեք չես պատկերացնի, թե ինչ նշանակություն ուներ այն օրվա հանդիպումն ինձ համար: Ես քեզ սիրում եմ»:
Այդժամ տղան տղան հասկացավ «Ես քեզ սիրում եմ» բառերը ժամանակին ասելու և սիրելի մարդկանց ժամանակ տրամադրելու կարևորությունը:
Անշուշտ, կյանքում ոչինչ մեր ընտանիքից ավելի կարևոր չէ: ժամանակ տրամադրենք մեր ընտանիքին. որովհետև պետք չէ հետոյին թողնել այնպիսի բաներ, ինչպիսիք են ուշադրությունը, հոգատարությունը, սերը:
