Թուրքիայի նախագահ Ռեջեփ Թայիփ Էրդողանը հայտարարել է, որ հոկտեմբերի 20-ին Ադրբեջանի նախագահ Իլհամ Ալիեւի հետ կմասնակցի օկուպացված Ղարաբաղում Զանգելանի օդանավակայանի բացմանը, հայտնում է Anadolu-ն։
«Իլհամ Ալիեւը մեզ խնդրել է ճշտել այցի ամսաթիվը։
Զանգելանի օդանավակայանի բացումից հետո կուղեւորվենք Ջաբրայիլ, որտեղ տեղի կունենա հանդիսավոր արարողություն։
Համապատասխան պայմանավորվածությունը ձեռք է բերվել։
Չեմ բացառում նաեւ այլ ղեկավարների մասնակցությունը Ադրբեջանում սպասվող իրադարձություններին։ Որոշումը Բաքվինն է»,- ասել է Էրդողանը։
Թուրքիայի նախագահ Ռեջեփ Թայիփ Էրդողանը հայտարարել է նաև, որ Ադրբեջանի նախագահ Իլհամ Ալիեւը տեղեկատվություն է ուղարկել Հայաստանի հետ սահմանին «ռազմական գործողության ավարտի» մասին, գրում է «ՌԻԱ Նովոստին»։
Այս մասին Էրդողանը հայտարարել է Սամարղանդից վերադառնալուն պես։
Միաժամանակ նա կրկնել է իր պնդումը, թե «գործողությունը» սկսվել է ի պատասխան Հայաստանի «սադրանքի»։
«Քանի որ գործողությունն արդեն ավարտված է, հիմա այն քննարկելու իմաստ չկա։ Պարոն Իլհամից ստացած տեղեկությունների համաձայն՝ մեր ադրբեջանցի եղբայրներն այժմ տեղափոխվել են անվտանգ դիրք»,- ասել է նա։
Երեւանի համար կարեւոր է «հրաժարվել Բաքվի դեմ սադրանքներից եւ գործել նախկինում ստանձնած պարտավորությունների համաձայն՝ հանուն խաղաղության եւ համագործակցության»,- ասել է Էրդողանը։
«Մենք ցանկանում ենք, որ մեր տարածաշրջանում նորմալացման գործընթացները հաջողությամբ ավարտվեն, իսկ տարածաշրջանային խաղաղությունն ու կայունությունը երկար ժամանակով ապահովվեն»,- ասել է Թուրքիայի նախագահը։
